Paggawa ng Silabus

PAGTUTURO NG PAGSUSULAT NG SANAYSAY ang ibig sabihin ng ikalawang semestre para sa maraming guro sa Filipino sa Ateneo. Sa mga araw bago magsimula ang sem, laging naisasailalim sa pagsusuri ang nagdaang silabus: pananatiliin ba ang istruktura o disenyo nito, ano-ano ang pagbabagong gagawin, may mga mahuhusay bang akdang nasulat nitong mga nagdaang taon/buwan na dapat mabasa ng mag-aaral--at kung gayon, alin sa mga dating ipinababasa ang kailangan nang bitiwan?

Hindi madali ang ganitong dagdag-bawas dahil sa dami ng konsiderasyon, pangunahin ang mga usaping posibleng mabuksan ng bawat isa sa talakayan sa loob ng klasrum (at kinakailangan siyempreng mabawasan, hangga't maaari, kung hindi man lubusang maiwasan, ang duplikasyon). Halimbawa, sa "Liham ng Isang Pilipinong Antropolohista sa Kanyang Kaibigang Kristiyano," ni Prospero Covar, na isa sa mga pinili ko, ilan lamang sa mga naiisip kong mapag-uusapan sa klase: ang pagpapaliwanag bilang anyo ng paglalahad sa sanaysay, ang iba't ibang anyo ng pananalig nang may tuon sa folk religion, ang conceit sa anyo ng liham/epistolaryo, ang manipulasyon sa tinig at tono kapag may tiyak na kausap, ang disiplina ng antropolohiya at ang pakikipamuhay bilang metodo ng pananaliksik, ang espasyo ng bundok (i.e., Bundok Banahaw) bilang lunan ng mistisismo at pagpapalaya.

Sa bandang huli, heto ang napagpasyahan kong maging disenyo at mga babasahin ng mga klase ko sa Filipino 12 ngayong darating na semestre (sa kabuuan, 19 na sanaysay at isang nobela):

Ang Sining ng Pakikipagtalastasan
“Sapagkat Buháy ang Wikang Filipino” ni Virgilio S. Almario
“Tsugi” ni Rolando B. Tolentino
“Huweteng” ni Roberto T. Añonuevo
“Kung Ano ang Inilalabas Mo sa Kubeta” ni Sherman C. Nones

Ang Pagsusulat Bilang Proseso
“Kung Susulat Ka” ni Jose T. Villarin, S. J.
“Paghahalungkat sa mga Alaala Bago Naisaplaka ang Kantang Nena” ni Heber Bartolome
“Si Baby Duria, ang Babaeng Gagamba” ni Benilda S. Santos

Ang Pagtatanghal ng Kulturang Popular sa Sanaysay

Paglalarawan

“San Antonio” ni Donato Mejia Alvarez

Pagsasalaysay
“Paalam Teks, Paalam Itlog” ni Jun Cruz Reyes

Teka Muna: Espasyo at Panahon sa Katha
Cubao 1980
ni Tony Perez

Pagmumuni-muni
“Suson-susong Suso” ni Jing Panganiban-Mendoza
“May Katulong sa Aking Sopas” ni Reuel Molina Aguila

Paglalahad 1: Pag-uulat
“Mga Batang Lansangan” ni Ricardo Lee
“Ang Komiks Bilang Salamin ng Buhay” ni Soledad S. Reyes

Paglalahad 2: Pagpapaliwanag
“Chapter 8: O Kung Paano Magsulat ng Romance Novel” ni Joi Barrios
“Liham ng Isang Pilipinong Antropolohista sa Kanyang Kaibigang Kristiyano” ni Prospero Covar

Paglalahad 3: Pagsusuri
“Malling, Subcontracting at Serbisyong Ekonomiya sa SM” ni Rolando B. Tolentino
“Mga Pagtalunton sa Pagitan ng Pamamaalam at Pagdating” ni Eli R. Guieb III

Pangangatwiran
“Ang Kuwento ng Nawawalang Ilog (O Isang Sulyap sa Bayan ng Pateros)” ni Wilfredo Pa. Virtusio
“Ang Pag-iisa ng Latin Amerika” ni Gabriel Garcia Marquez, salin ni Teresita Maceda

6 Responses to Paggawa ng Silabus

  1. saan matatagpuan ang paalam tex, paalam itlog ni jcreyes? nagblo-blog na ba sya? (asa pa noh? hehe)

  2. nasa libro niyang "ilang taon na ang problema mo?" ang "paalam teks" ni ser jun. hindi "pa" siya nagba-blog sa pagkakaalam ko, pero ngayong doktor na siya (kahapon lang siya nagdepensa ng disertasyon), baka may panahon na siyang harapin ang internet. :-)

  3. huwaw! anu yung disertasyon nya? yung amado?

    san pala nakakabili ng "ilang tao...?" hindi yan up press di ba?

    (parang gusto kong makipagpustahan na di nya mapagtyatyagaan ang internet. hehe)

  4. oo, iyong kay amado ang disertasyon niya. sa anvil ang "ilang taon na" pero hindi ko lang alam kung available pa ito sa bookstores dahil 1995 pa ang copyright year nito. :-)

  5. sir edgar, may kopya po ba kayo ng "ang kuwento ng nawawalang ilog" o di kaya ay "ang daga sa hawla" ni Wilfredo Virtusio?her

  6. May kopya ng sanaysay ni Virtusio sa "Burador" na inedit ni Alvin B. Yapan at inilathala ng Ateneo Press. Ito ang ginagamit naming teksbuk sa Fil 12 sa Ateneo.